Атырау облысының Бас имамы Болатбек Ұласқанұлының төрағалығымен қала имамдары бас қосып, Қазақстан Республикасы Президентінің Жолдауында айтылған мәселелерді талқылады.
Жиында сөз сөйлеген Бас имам Болатбек Ұласқанұлы:
«Қоғамдағы тыныштық пен тұрақтылық – бәрімізге ортақ игілік. Әсіре діншілдік пен жат ағымдардың алдын алу – дін қызметкерлерінің басты міндеттерінің бірі. Біз халыққа дәстүрлі ислам құндылықтарын, ата-баба жолын насихаттап, имандылық пен бірлікке шақыруымыз қажет. Сонымен бірге, мешіт – қасиетті орын. Мұнда тәртіп сақталып, әр имам өзінің әдебі мен жауапкершілігін айқын сезінуі керек. Халық бізге қарап бағдар алады. Сондықтан дін қызметкерінің әрбір ісі үлгіге айналуы тиіс», – деп атап өтті.
Жиын барысында мешіт ішіндегі тәртіп, дін қызметкерлерінің әдеп нормалары және қоғамдағы діни тұрақтылықты сақтау бағытындағы жұмыстар жан-жақты қаралды.
