Қазақстан мұсылмандары діни басқармасының төрағасы Наурызбай қажы Тағанұлы Атырау облысына барған сапарында «Алмалы» мешітінде жұма намазын жүргізіп, жамағатқа уағыз айтты.
«Исламдағы тәрбие негіздері» тақырыбында уағыз айтқан Бас мүфти: «Жаратушының адам баласына беретін бұл дүниедегі үлкен нығметтерінің бірі – перзент сүю. Перзенттің дүниеге келуі арқылы ерлі-зайыптылардың отбасылық өміріне мән-мағына кіріп, ортақ мақсат қалыптасады. Алла Тағала қасиетті Құранның «Кәһф»сүресінің 46-аятында:
«Мал мен балалар – дүние тіршілігінің сәні», – деп айтылған.
Балалар біздерге берілген нығмет болуымен қатар оларға тәрбие беру – аманат. Ардақты Пайғамбарымыз (оған Алланың салауаты мен сәлемі болсын):
«Кімнің баласы дүниеге келсе оның есімін көркем етіп қойсын әрі әдебін жақсартсын», – деген.
Әрбір нығмет шүкірлікті қажет етеді. Жаратушыға ұрпақ бергені үшін шүкірлік айтуымыз – баламызға дұрыс тәрбие берумен өлшенеді. Осыны терең түсінген ата-бабаларымыз өскелең ұрпақ тәрбиесіне ерекше көңіл бөліп, әрбір шаңырақтың ұл-қызы ізгі, иманды да ибалы болып жетілуіне мән беріп, оны ұлттың болашағы ретінде қараған. Даналық сөзде: «Бір жылдығын ойлаған халық бидай егеді, жүз жылдығын ойлаған халық ағаш егеді, мың жылдығын ойлаған халық саналы ұрпақ тәрбиелейді», – деп айтылған.
Алла Тағала ұрпақтарымыздың иманды да ізгі болуын нәсіп етіп, халқымызға амандық, елімізге тыныштық бергей! Жаратушымыз қасиетті жұма күнгі дұға-тілектерімізді қабыл етсін!» деді.
