Атырау қаласына қарасты Еркінқала ауылындағы Қайтпай Сұлтан мешітінде бірқатар игі істер атқарылды. Мешіт ішінде жөндеу жұмыстары жүргізіліп, жамағатқа арналған жаңа Құран оқу бөлмесі ашылды. Сондай-ақ, ҚМДБ баспасының кітаптары қойылған арнайы кітап бұрышы жасақталды.
Мешіт имамы Арман Амангелдіұлының бастамасымен шара барысында ауылдың үлкендеріне құрмет көрсетіліп, бес отбасыға қайырымдылық көмек берілді.
– «Мешіт – тек құлшылық орны ғана емес, рухани және қайырымдылық орталығы болуы тиіс. Жамағатқа жайлы жағдай жасап, қоғамға игілік ету – біздің ортақ міндетіміз», – деді имам Арман Амангелдіұлы.
Жергілікті тұрғындар имам мен жамағаттың ұйымдастырушылығына алғыстарын білдіріп, мешіт жанындағы игі істердің жалғасын табуына тілектестігін білдірді.
