Сағыз ауылындағы «Шұғыла» мәдениет үйінде бала тәрбиесіне арналған келелі жиын өтті. Шараға ауылдық округ әкімі, жергілікті полиция өкілдері, мектеп директорлары, ардагерлер кеңесінің мүшелері мен психологтар қатысты.
Кездесудің мақсаты — жасөспірімдердің тәрбиесіне ата-ана, мектеп және қоғам тарапынан бірлескен қолдау көрсетудің маңызын арттыру болды.
Жиын барысында «Абдолла хазірет» мешітінің имамы Нұрмұхаммад Шахасанұлы сөз сөйлеп, баланың рухани тәрбиесіндегі ата-ананың жауапкершілігіне тоқталды.
«Бүгінгі бала — ертеңгі елдің иесі. Сол себепті оның ортасы, қоршаған ортаның ықпалы мен әлеуметтік желіні дұрыс пайдалану мәдениеті — тәрбиенің басты бөлігі. Имандылық — тәрбиенің ең жоғарғы шыңы. Егер баланың жүрегіне иман дәні егілсе, ол жамандықтан бойын аулақ ұстап, адалдық пен ізгілік жолында өседі. Балаға ең үлкен мұра — байлық емес, иман мен жақсы мінез. Сондықтан әр ата-ана баласына дұрыстықты өз ісімен көрсетуі керек», — деді имам.
Кездесу соңында қатысушылар өзара пікір алмасып, ауыл жастарын тәрбиелеуде бірлесіп жұмыс істеудің маңызын атап өтті.
