Бүгін, 9 ақпан, қазақтың ақиық ақыны Мұқағали Мақатаевтың туған күні. Ақынның шығармашылығы қысқа өміріне қарамастан терең философиялық ойға, рухани ізденіске толы. Оның өлеңдерінде тек махаббат, туған жер, табиғат тақырыбы ғана емес, адам болмысы, иман мен дін мәселелері де маңызды орын алады.
Мұқағалидың шығармаларында дін мен иманға деген құрмет, адамгершілікке шақыру, жамандық пен адалдық арасындағы таңдау мәселесі жиі көрініс табады. Ақын дінді, жүректегі тазалық пен адалдықты дәріптей отырып, әр адамға рухани кемелдікке ұмтылуға үндейді.
Мысалы, ақынның дінге қатысты өлең жолдарында:
Қаймағы бұзылмаған қайран дінім,
Қаймағың быт‑шыт болды қайдан бүгін?!
Құбылаға бет алып қол қусырып,
Сәждеге жығылатын қайда күнім?
Сатпаймын, сатқан емен дінімді мен,
Өлмейтін, өшпейтұғын күнім білем.
Таппайтын күнде тыным, түнде тыным,
Мұсылман – Мұхаммедтің үмбетімін.
Бәрі рас айтқанының Ақ Алламның,
Құм менен топырақтан жаралғанмын.
Құдайдың құлымын мен – мұсылманмын,
Денемде түйірі жоқ арам қанның.
Бұл жолдарда ақынның дінге деген шынайы сүйіспеншілігі, иман тазалығы, және адамдық пен рухани кемелдікке ұмтылысы айқын көрінеді. Мұқағали дінді жалған түсініктен арылтқысы келіп, шынайы сенім мен тазалықты жырлайды.
Сонымен қатар, ақынның шығармашылығы арқылы бүгінгі қоғам да рухани сабақ алып, өмірінде адалдық пен ізгілікке жол таба алады. Мұқағалидың бұл ойлары қазақ әдебиеті мен мәдениетінде мәңгілік қазына болып қала береді.
Дайындаған: Нұркен Мағриденұлы
