Қасиетті Рамазан айының алғашқы күнінде Зекет және қайырымдылық қорының өңірдегі өкілдерінің ұйымдастыруымен «Рамазан сыйы» қайырымдылық шарасы өтті. Іс-шара аясында әлеуметтік тұрғыда осал санатқа жататын отыз отбасыға азық-түлік себеттері үлестірілді.
Қайырымдылық шарасына Болатбек Ұласқанұлы, Атырау облысының бас имамы қатысып, жиналған жамағатқа Рамазан айының қадір-қасиеті, қайырымдылық пен жанашырлықтың маңызы туралы тағылымды насихат айтты. Сондай-ақ бас имам игі іске қолдау білдірген демеуші азаматтарға алғысын жеткізіп, мұқтаж жандарға қамқорлық көрсету – мұсылман баласының басты міндеттерінің бірі екенін атап өтті.
Шара барысында көмекке ие болған отбасылар, зағип жандар мен өзге де әлеуметтік топ өкілдері ұйымдастырушылар мен демеушілерге шынайы ризашылықтарын білдірді. Айта кетейік, мұндай қайырымдылық бастамалары қасиетті Рамазан айы бойы жалғасын табатын болады.
