Бүгін қасиетті жұма күні өңірдің бас имамы Болатбек Ұласқанұлы жаңадан ашылған Ортақшыл ауылы мешітінде жұма уағызын жүргізіп, жиылған жамағатқа насихат айтты. Исламдағы сауда-саттық әдебі тақырыбында өрбіген жұма уағызында бас имам:
Сауда – тек пайда табудың жолы ғана емес, мұсылманның ар-ожданы мен сенімін айқындайтын маңызды тақырып. Исламда сауда-саттықтың әдептері – пайданы ғана емес, пенденің парасатын, шыншылдығын, тақуалығын айқындайтын өлшем. Әрбір саудагер – тек сатып алушының емес, Раббысының алдында да жауапты екенін ұмытпауы тиіс. Адал табыс – берекенің кілті, әділ мәміле – қоғамға сенім ұялататын негіз. Екі дүниенің бақытына ұмтылған жан үшін сауда – тек кәсіп емес, екі дүниенің де нығметіне жол ашатын құлшылық. Сондықтан шынайы саудагер – сөзіне берік, таразыға әділ болуы тиіс. Өйткені сауда – пайғамбарлар аманаты, үмбетке қалдырған асыл өнегесі,-деп сөзін түйіндеп, жиылған жамағатпен бірге ел мен жердің амандығы, халықтың бірлігін тілеп қасиетті құранның батасын жасады.
