– Нарскес ұстаз, алдымен уақытыңызды бөліп бергеніңізге рахмет. Өзіңіз туралы қысқаша айтып өтсеңіз.
– Аллаға шүкір, Атырау облысында имам болып қызмет етіп келемін. Дін саласындағы жұмыстан бөлек, спортты өмірімнің ажырамас бөлігіне айналдырдым. Соның ішінде триатлон – менің ең үлкен қызығушылығым. Себебі бұл спорт – адамның ерік-жігерін, сабырын, тәртібін тәрбиелейтін ерекше сала.
– «Ironman» жарысына қатысуға не түрткі болды?
– Біріншіден, өз-өзімді сынағым келді. Адам шектеуді өзі қояды, ал шын мәнінде Алла адамға үлкен мүмкіндіктер берген. Екіншіден, жастарға үлгі болғым келді. Имам тек мешітте ғана емес, қоғамда да, спортта да белсенді болуы керек. Үшіншіден, спорт денсаулықтың аманаты. Пайғамбарымыз (с.а.с) «Күшті мұсылман – әлсіз мұсылманнан қайырлы» деген. Сол күшті болуға талпыныс.
– Жарыс алдындағы дайындық қалай өтті?
– Айына 250–300 км велосипед тептім, 40–50 км жүгіру, 10 км-ге дейін үздіксіз жүзу жаттығуларын жасадым. Бұл – тек физикалық емес, рухани дайындық та. Таңғы уақытта жүру – тыныштық, ойлану, дұға ету. Әр жаттығу маған сабыр, тәртіп және тұрақтылық сыйлады.
– Ironman жарысы кезінде ең қиын сәт қай кезде болды?
– Велосипед кезеңінің соңында шаршау қатты сезілді. Дене ауырлап, аяқтар тыңдамай қалады. Сол кезде өзіме: «Бұл тек жарыс емес, бұл – ниет, бұл – мақсат. Шыдау керек», – деп рух бердім. Дәл сол сәтте Алланың жәрдемі мен жанкүйерлердің тілегі күш сыйлады.
– Имам ретінде осындай спорттық жарыстарға қатысудың қандай рухани пайдасын айтасыз?
– Біріншісі – ниеттің тәрбиесі. Әр қадамда дұрыс ниет пен сабыр керек.
– Екіншісі – уақытты басқару. Дін қызметінде уақыт өте қымбат. Спорт оны дұрыс жоспарлауға үйретеді.
– Үшіншісі – жамағатқа үлгі болу. «Имам спортпен айналыспайды» деген түсінікті бұзу маңызды. Біз денсаулығымызды аманат деп түсінеміз.
– Төртіншісі – рухани тазалық. Спорт – күйзелісті жеңілдететін, жүректі тыныштандыратын күш.
– Жастарға қандай кеңес берер едіңіз?
– Жастарға айтарым: спортпен айналысу – бұл сән емес, қажеттілік. Таза ауа, дұрыс тамақтану, уақытылы жаттығу – бұл адамның өзін құрметтеуі.
– Екіншіден, кез келген бастамада сабыр болсын. Тез нәтиже күтпеңдер.
– Үшіншіден, жаман әдеттен арылудың ең жақсы жолы – спорт. Спорт тәртіп береді.
– Алдағы жоспарыңыз қандай?
– Алла қаласа, келесі жылы толық Ironman емес, «Half Ironman» жарыстарына қатысуды жоспарлап жүрмін. Сонымен бірге өңірдегі жас спортшылармен кездесу, оларды ынталандыру бағытында іс-шаралар өткізбекпін.
– Әңгімеңізге рахмет. Жарыстағы және рухани жолдағы еңбегіңізге Алла жар болсын!
– Алла разы болсын. Баршаға денсаулық, береке тілеймін.
Сұхбаттасқан Нұркен Мағриденұлы
