Бүгін, қасиетті жұма күні Бас мүфти Наурызбай қажы Тағанұлы Қостанай облыстық орталық мешітінде өткен қайырымдылық іс-шарасына қатысты.
Игі іс-шарада ҚМДБ Төрағасы көмекке аса мұқтаж 20 отбасыға жомарт жандардың тарапынан ұйымдастырылған қаражатты табыстап, қуанышқа бөледі.
«Біздің бабаларымыз ұрпақтарын әрдайым жақсылық жасауға, өзгеге қол ұшын беруге үйреткен. Көршіге көмектесу, жетімге қарайласу, мұқтаж болған кісілерге жәрдем беру, жолда қалғандарға пана болу секілді қайырымды істер халқымызда өмірлік дәстүрге айналған.
Сондықтан халқымыз «Қайырымдылық жасасаң, қайырын өзің көресің»; «Өзін ғана ойлаған, жамандықтың белгісі. Өзгені де ойлаған, адамдықтың белгісі» деп, жақсылық жасауға, басқаларға көмек беруге үндеген.
Қазақстан мұсылмандары діни басқармасы өзінің жеті бағыт бойынша жұмыстарында қайырымдылыққа басымдық беріп келеді. Бұл бағыт бойынша іс-шараларымыз жалғасын таба береді» деді Наурызбай қажы Тағанұлы.
