ҚМДБ жанындағы “Мұнара” рухани-танымдық телеарнасының арнайы түсірілім тобы Атырау облысына жұмыс сапарымен келіп, өңірдің рухани өмірінен бірқатар мазмұнды хабарлар әзірледі. Түсірілімді телеарнаның басшысы Болат Көкенайұлының өзі бастап келді.
Сапар барысында облыстың бас имамы Болатбек Ұласқанұлы “Иманым – жиғаным” бағдарламасына қатысып, имандылық, ізгілік және рухани тәлім тақырыптарында сұхбат берді. Сондай-ақ “Күйші-термешілер” бағдарламасына өңірдің өнерпаздары қатысып, “Күмбір күй” айдарымен ұлттық өнердің өрісін танытты.
Сонымен қатар, жергілікті имамдар “Отбасы кодексі” бағдарламасына қатысып, қоғамдағы отбасы құндылығын сақтау, ұрпақ тәрбиесіндегі жауапкершілік, неке мен отбасылық құқық мәселелері бойынша ой бөлісті.
Түсірілім тобы Атырау тарихындағы киелі орындардың бірі — Хан ордалы Сарайшықта болып, “Тарихтан тағылым” атты арнайы бағдарламаның кезекті шығарылымын түсірді.
Аймақтың рухани келбетін таныстыру мақсатымен жасалған сапарда өңірдегі көне әрі көрнекті ғибадатханалардың бірі — Құспан молла мешіті де назардан тыс қалмай, телеарнаның кадрына енгізілді.
“Мұнара” телеарнасы алдағы уақытта да өңірлердің рухани тыныс-тіршілігін кеңінен насихаттауды жалғастырмақ.
