Атырау облысының Бас имамы Алтынбек Ұтысханұлы Халел Досмұхамедов атындағы Атырау университетінде жастармен кездесті.
Кездесу барысында Бас имам Алтынбек Ұтысханұлы «Білім. Тәрбие. Әдеп» тақырыптарында насихат айтты.
Ата-бабаларымыз да мақал-мәтелдерде: «Білімдіге дүние жарық, білімсіздің күні кәріп», «Жеті жұрттың тілін біл, жеті түрлі білім біл», «Білегі күшті бірді жығады, білімі күшті мыңды жығады», – деп білім алудың артықшылықтары жөнінде өте көп айтқан.
Білім алуға ықылас қойып, оған амал етуді көздеген адам әрдайым ізденісте болуы қажет.
Мұзафар Әлімбаев: «Білім – қымбат қазына, қанағат тұтпа азына», – деп айтқанындай, адам баласы алған білімін қанағат тұтып тоқтап қалмай, өмірбақи ізденіп, даму үстінде болуы қажет. Сол себепті де бұрынғы өткен даналардан: «Екі адам тоймайды. Бірі – дүние іздеген адам, ал екіншісі – білім іздеген адам», – деген сөз қалған» деп атап өтті Бас имам Алтынбек Ұтысханұлы.
