Өңірдің бас имамы Болатбек Ұласқанұлы Құрманғазы аудандық “Темірәлі” мешітінде жұма уағызын жүргізді.
Намаздың қасиеті мен жамағатпен оқудың сауабы тақырыбында өткен жұма уағызында бас имам Намаз – діннің ең басты рәмізі. Ислам дінінде пенде мен Раббының арасындағы тұрақты байланыс. Сол арқылы пенде Раббысына жақындайды, күнә-кемшіліктерінен тазарады, туралықпен өмір сүру салты нығая түседі және намаз арқылы нәпсінің азғыруы мен қыспағынан сақтанады. Намаз пайғамбарлар мен әулие-әнбиелер үшін және барлық ізгі пенделердің ең басты байлығы, дүниедегі ең сүйікті ісі болған. Өмірдің ешбір ләззаты оның намаздан алған ләззатындай болмайды. Ардақты Пайғамбарымыз (оған Алланың салауаты мен сәлемі болсын) намазды «Діннің тірегі», «Мүминнің миғражы», «Жұмақтың кілті», «Көзімнің нұры» деп түрлі атаулармен атаған. Мұның барлығы намаз оқудың қаншалықты маңызды екендігінің көрінісі. Алла Елшісі (оған Алланың салауаты мен сәлемі болсын):
«Жәннаттың кілті – намаз, ал намаздың кілті – дәрет», – деген. Алла Тағала біздерді шынайы ниетімен намаз оқушылар қатарынан етіп, қасиетті жұма күнгі дұға-тілектерімізді қабыл еткей деп,- тілегін жеткізді бас имам.
Жұма соңында бас имам жамағатпен бірге дүниеден дін қызметкердеріне, ата-бабалар рухына дұға бағыштады
