Құрманғазы және Исатай аудандарында Қазақстан мұсылмандары діни басқармасының шариғат және пәтуа саласының мамандары жамағатпен және аудан тұрғындарымен кездесу өткізіп, көкейінде жүрген діни сұрақтарына жан-жақты жауап берді.
Кездесу барысында “Иманғали” орталық мешітінің наиб имамы Мұрат Мұстафаев азаматтарға намаз, ораза, зекет, шариғи үкімдер және күнделікті өмірде туындайтын түрлі діни мәселелерге қатысты сұрақтарына жауап берсе, ұстаз Наркес Боханов отбасылық мәселелер бойынша әрбір сауалға нақты, шариғат негізінде тұщымды жауап беріп, тұрғындарға сенімді діни бағыт-бағдар берді.
Кездесу аясында мамандар отбасы тәрбиесі мен құндылықтары жайлы да арнайы тоқталып өтті. Олар отбасындағы өзара сыйластық, адалдық, жауапкершілік, бала тәрбиесі сынды мәселелерге шариғат тұрғысынан баға беріп, қоғамдағы отбасы институтының рөліне назар аудартты.
“Исламда отбасы – қоғамның негізі. Ер мен әйел бір-біріне аманат, ал бала – Алланың сыйы. Шариғат әрбір отбасы мүшесінің міндетін айқын көрсеткен. Егер әркім өз орнын дұрыс түсініп, соған сай әрекет етсе, берекелі шаңырақ пен тату қоғам қалыптасады,” – деді мамандардың бірі.
Жиын соңында жамағат алғысын білдіріп, осындай кездесулердің алдағы уақытта да жалғасуына тілек білдірді.
