Атырау облысында Құрбан айт мерекесі мен Қазақстан мұсылмандары діни басқармасының Әйел-қыздар секторының 10 жылдығына орай рухани іс-шара ұйымдастырылды.
Игі шараға ҚМДБ Әйел-қыздар секторының меңгерушісі Динара Құтқожақызы, Алматы қаласы әйел-қыздар секторының жетекшісі Гүлмира Ілесбай және Шымкент қаласы бойынша әйел-қыздар секторының жетекшісі Балжан Асылханқызы арнайы қатысты.
Жиын барысында насихат айтылып, рухани мазмұндағы бағдарламалар өткізілді. Сондай-ақ Құранға түскен шәкірттерге тәж кигізіліп, қасиетті Құран табысталды.
Шараны әйел-қыздар секторының өңірлік өкілдері мен «Муслима Фирдаус» еріктілері ұйымдастырды. Іс-шараның мақсаты – рухани құндылықтарды дәріптеу, Құран ілімін насихаттау және қоғамдағы ізгілік пен бірлікті арттыру болды.
